الجمعة، 24 مارس، 2017

الأمراض الخطيرة تهدد حياة سكان القاهرة الجديدة بعد اختلاط مياه الشرب بالمجاري بمناطق عديدة بالمدينة



باتت الأمراض الخطيرة تهدد حياة سكان مدينة القاهرة الجديدة، بعد اختلاط مياه الشرب بمياه الصرف الصحي بمناطق عديدة بالمدينة، وذلك بعد ما تلاحظ لسكان المدينة خلال شهري فبراير ومارس من العام الجاري انبعاث روائح غير طبيعية بمياه الشرب المتدفقة من الحنفيات بالعديد من المناطق بالمدينة، كما أكد السكان على تغير لون وطعم المياه وأنها أشبه بمياه الصرف الصحي، مستنكرين عجز الأجهزة المسئولة عن اتخاذ الخطوات الفعالة لحل المشكلة رغم إبلاغهم بها، ومحذرين من أن المناطق المنكوبة بالمدينة في حالة ازدياد، وأن مشكلة تلوث مياه الشرب في طريقها سريعا للانتقال لكافة مناطق المدينة.

وأكدت ملاحظات سكان مدينة القاهرة الجديدة عن مياه الشرب الواصلة إلى منازلهم؛ اختلاطها بمياه الصرف الصحي بمناطق عديدة بالمدينة، فتقول دينا حسن: احنا عندنا في جنوب الاكاديمية المياه ريحتها مجاري ولونها مغير.

رانيا حسين: أنا فى الحى الأول و الميه ريحتها وحشة. 

جوانا الكاشف: رائحة المياه متغيرة في البنفسج.

ياسمين مصطفى: انا فى الرحاب والميه ريحتها غريبة.

نهى عبداللطيف: النهارده المياه كانت ريحتها صرف صحي.. كانت قويه جدا.

ياسر محروس: احنا عندنا في جنوب الاكاديمية الريحه صعبة.

إبراهيم أبو هرجة: المياه فيها سم قاتل .. ريحة المجاري انتشرت في النرجس فيلات .. احظروا ممنوع منعا باتا الشرب منها او طبيخ او غسل اي شئ.

رشا نبيل: نرجو مساندتكم للتصعد ويصل صوتنا الى المسئولين .. نحن سكان المستثمرين الشمالية بالتجمع الاول كمباونذ الجوهرة، الفدا، الشهدا، حياة .. الخ، نعانى منذ اكثر من 20 يوم من رائحة وطعم ولون مياه الشرب وتم ابلاغ شركة المياة وحضروا واخذو عينات لتحليلها اكثر من مرة ويتم ابلاغنا بعد صلاحيتها للشرب او الاستعمال نهائى شفهيا دون تقرير رسمى، وبالامس اكتشفوا ان نادى البنك المركزى موصل خط المياة العكرة الخاصة به على خط مياة الشرب وتم غلق المحبس وكسره بمعرفة الشركة وتم غسيل المواسير الخاصة بالكمباونذ عن طريق شفط المياه وضخ مياة نظيفة اكثر من مرة حتى تاكدنا من تحسن رائحتها واليوم رجعت رائحة المجارى تانى للمياة وتم ابلاغ الشركة والمسئولين مرة اخرى وافادو عن انه من المؤكد انه يوجد كمباوند  اخر او اكثر فى المستثمرين الشمالية موصل مياة عكرة على خط مياة الشرب ومش عارفين مين هو لانه جايز يكون موصله بطريق غير رسمى.. انا باناشد كل المسؤلين عن كمباونذ المستثمرين الشمالية رحمة بنا وباطفالنا ان يتاكدو من عدم خلط مواسير المياة ببعضها.

مديحة حنفي: احنا شمين ريحة مجاري فى الحنفيات فى الحى الثانى مش عارفين نعمل ايه.

مي سيد: بقالها سنة تقربيا في البنفسج ريحة المياه متغيرة.

إسراء يحيى: المياه ريحتها كبريت.

إمام فهمي: فعلا الميه ريحتها صعبة قوى ربنا يلطف بينا وبأولادنا.

هشام نبيل: الحي الرابع مصاب برضه.

سارة سيد: بصراحة مش عارفة احدد.. بس انا كتير افتح الحنفية الاقي ريحة مجاري لدرجة في الاول كنت اعد ادور جاية منين الريحة لغاية مابدأت اربط بين الريحة وفتح المياه واكتشفت الحقيقة المرة.

محمود تمام: انا شميت ريحة غريبة في الميه بس مش ريحة مجاري كأنها غاز او كبريت الحي الاول منطقة 7 .. فين الجهاز وشركة المياه ونائب الشعب من المهزلة دي. 

سندس خاطر: المياه متغيرة في جنوب الأكاديمية.منشور بـ"القاهرة الجديدة اليوم"
 
بوسي جمال: احنا بقالنا اكتر من شهر بنعاني في كمبوند حدائق الفدا .. في الاول كنا بشم زي ريحة حاجة محروقة و اكدب نفسي و بعدين لقيت جارتي كمان بتشتكي .. شركة المية متحركتش غير متأخر، جوزي راحلهم بعينة عشان يحللوها .. عملولنا البحر طحينة وحسسونا ان المشكلة في عمارتنا فقط .. قالوله اتاكد الاول ان المشكلة مش في العمارة ولا من الكمبوند و مرضيوش يحللوا المية .. وهما عارفين ان المشكلة من عندهم و مكتمين حسبي الله ونعم الوكيل والله العظيم احنا لو في دولة محترمة كان اقل حاجة تعويض لكل شقة متضررة وكمان مندفعش حق المية .. ندفع فلوس عشان بيشربونا مية مجاري !! .. نائب رئيس الجهاز متواطئ معاهم اصلا و بمعنى اصح قال كلموا الوزير ان شاء الله تكلمه الرئيس حتى .. وفعلا في ناس كلمت وزير الاسكان عشان يحلها و اتحلت يومين ورجعت تاني شركة المية بتحل حلول مؤقتة.. لازم نرفع قضية جماعية على شركة المية عشان اللي بيحصل ده قمة في الاجرام .. والله العظيم قاعدة عند امي بقالي عشر أيام و سايبة تل غسيل في البيت و تل مواعين وعندي طفلة يعني محتاجة تغير هدوم كل يوم  وسالوبيتات .. هدومنا خلصت و هضطر انقل تل الغسيل عشان اغسله عند ماما حسبي الله ونعم الوكيل و يا رب اللي كان السبب في المشكلة دي ربنا يبتليه بالفشل الكلوي آمين.

وأضافت: دي مش مشكلة فردية دي مشكلة عامة وواضح انها انتشرت في اكتر من منطقة بعد ما كانت في منطقتين فقط وده ان دل على شئ يدل على فشل الجهاز و فشل شركة المية .. حسبي الله ونعم الوكيل في كل فاشل وكل مرتشي وكل من له يد في الموضوع ده و في كل من تسبب لينا بالاذى .. انا بشيل الغسيل من المنشر ريحته تقرف بالذات الحاجات الشتوي التقيلة .. لانها مية مجاري بتعطن في الهدوم .. احنا في كارثة الله ينتقم منهم .. يا ريت نلاقي حل  ..اكيد شركة المية مش هتدين نفسها ..  يا ريت محامي يرفعلنا قضية عليهم عشان كدة هيحيبولنا فشل كلوي الله ينتقم منهم ومن اللي كان السبب.

  
فاطيما حامد: طعم المياه وريحتها متغيرين .. بس مش مجاري.. النرجس 4.

سالي خطاب: انا عندى المياه في النرجس ريحتها صعبة والموضوع ده كارثة.منشور بـ"القاهرة الجديدة اليوم"

سناء عثمان: في البنفسج بقالنا اكتر من سنة  المياه رائحتها مجاري.

علاء شحاتة: المستثمرين الجنوبية من امبارح ريحة كريهة وتغيير في الطعم.

رضوى أشرف: احنا سكان كمبوند الجوهرة بالمستثمرين الشمالية التجمع الخامس، احنا بنعاني من دخول مياه المجاري في الحنفيات انقذونا شركه المياه بتحل حلول مؤقتة وبعد يومين بترجع المشكله .. بلغنا و بقالنا من يوم 14 فبراير في الكارثه دي .. ورحنا لرئيس الجهاز ورئيس شركة المياه .. وكل شويه وعود انها اتحلت وبترجع مياه مجاري بعد اقل من يومين .. المعمل اخد عينات كتير جدا.. وهوه اللي قال انها غير صالحة للاستخدام .. احنا في كارثة ياريت حد ينقذنا .. انقذونا قبل ما ولادنا تموت.. هنصعد ايه اكتر من رئيس شركة المياه ورئيس جهاز القاهرة الجديدة .. رئيس الجهاز نفسه كان موجود عند حد من الجيران وبيقول المشكلة اتحلت و المية مفيهاش حاجة .. جارتي جابتله كوباية مية من الحنفية رفض يشربها .. دي كارثة.

وأضافت: ممكن الناس اللي بتشكتي من مية المجاري نتجمع ونرفع قضية على شركة المية عشان صحتنا مش  ببلاش، اللي عرفته ان شركة المية متحركتش غير لما طفل شرب من المية ودخل المستشفى، وإن في أرض تبع البنك المركزي هما لعبوا في المواسير الرئيسية وان شركة المية رافعة عليهم قضية حاليا، وحسبي الله ونعم الوكيل و في كل واحد بيأذي غيره.

سعاد حميدة: احنا في كمبوند ريتاج المياه رائحتها مجاري من يومين.

أحمد سليمان: في أماكن زي عندنا كده في المستثمرين الشمالية ميه الصرف داخله علي ميه الشرب.

سلوى مجدي: الميه ريحتها غريبه و مليانه رغاوي و نازله من الحنفيه سخنه .. منطقة المستثمرين الشمالية.

رشيدة الشناوي: اوعو تستعملو المياه خالص حتى فى الغسيل لانها مملوءة بكتيريا انا اللثة عندى التهبت وجالى قرح فى فمى لانى باتوضأ منها، حسبنا الله ونعم الوكيل فى اللى ضرنا الضرر ده كله كومباوندز الجوهرة، حدائق الفدا، حياة هايتسى بالمستثمرين الشمالية، انا زوجى وحفيدتى جالهم نزلة معاوية لمجرد انهم شربوا من مج مغسول بالمياه فقط.

رضوى ممدوح: حسبي الله في جهاز التجمع هو اللي عنده المياه المعالجه دي وبيديها للنوادي وأماكن لري الزرع بدون رقابة وداخل النوادي بيعملوا شبكات لتقليل تكلفة المياه الحلوة و ببدمجوها ببعض و تخرج علينا لما ظغط مياه الشرب تقل.

ويتساءل أحمد الهنداوي: معظمنا أو كلنا بنشتكي من نفس المشاكل (الطرق الغير آدميه ، مياه شرب غير صالحه حتى للحيوانات ، بلاعات الصرف الصحي  الغير مغطاه) بصفه عامة المرافق الغير آدمية.. ومعظمنا قدم شكاوي للجهاز ولا حياه لمن تنادي.. طيب احنا ليه مش قادرين نوصل مشاكلنا دي للإعلام ؟ ونفضح المسؤلين عن جهاز القاهرة الجديدة.. بجد والله سكوت سكان التجمع هيخلي التجمع مع المسقبل منطقة عشوائية.

موضوعات ذات صلة:
الإسكان: افتتاح وتشغيل محطة مياه القاهرة الجديدة خلال أيام واعتبارها مصدرا أساسيا لتغذية العاصمة الإدارية | والمدينة تودع ضعف وانقطاع المياه عنها 

إبحث في منشوراتنا عن موضوع يهمك - ضع "كلمة" أو "عبارة" للبحث عنها

المقالات المنشورة مؤخرا

شاهد جميع الأخبار من الأحدث الى الأقدم .. إضغط على "الشهر" أو "العام" لمشاهدة الأخبار المنشورة فيه

شاهد أكبر مجموعة من مقاطع الفيديو لمشروع «دار مصر» على قناتنا على «يوتيوب»

فيديو مميز: مقارنة بين تشطيبات النماذج الأربعة المعتمدة بمشروع «دار مصر» لـ4 وحدات 130م2

لا يفوتك متابعة 42 صفحة وجروب وقناة واصدار، اسستها «القاهرة الجديدة اليوم» منذ اطلاقها في 6 أكتوبر 2014:

لا يفوتك متابعة صفحات مميزة على فيسبوك أسستها وتديرها «القاهرة الجديدة اليوم» من بينها:

ومتابعة صفحات وجروبات مميزة على فيسبوك أسستها وتشارك في إدارتها «القاهرة الجديدة اليوم» من بينها:

ومتابعة صفحات مميزة على تويتر أسستها وتديرها «القاهرة الجديدة اليوم» من بينها: * صفحة: New Cairo Today

ومتابعة صفحات مميزة على جوجل بلس أسستها وتديرها «القاهرة الجديدة اليوم» من بينها: * صفحة: القاهرة الجديدة اليوم New Cairo Today

ومتابعة قنوات مميزة على يوتيوب أسستها وتديرها «القاهرة الجديدة اليوم» من بينها: * قناة: القاهرة الجديدة اليوم New Cairo Today