ابحث في موقعنا

السبت، 6 أغسطس 2016

حاجزون بـ"دار مصر" يعاودون اكتشافهم لأخطاء جديدة في المشروع في ظل انعدام الرقابة عليه


تداول حاجزو مشروع دار مصر للإسكان المتوسط، صورا لتركيب حوامل تكييفات بإجدى عمارات المشروع بمدينة الشروق، وسط حالة من عدم الرضا منهم على القائمين على تنفيذ العمل بالمشروع، بعد اكتشافهم لأخطاء جديدة في تركيب حوامل التكييفات، في ظل انعدام الرقابة على المشروع التي يشكو منها الحاجزون منذ بدئه، والتي دأب الحاجزون على علاجها بفرض رقابتهم الشخصية على ما يتم تنفيذه بالمشروع عبر مواقع التواصل الاجتماعي ومنها للإعلام والمسئولين.

يقول "وليد زكريا" من حاجزي المشروع بمدينة الشروق": "قمت بتصوير تركيب حوامل التكيفات الاربعة، وتم عمل حساب تكيف الريسبشن انه هيكون كبير علشان كدة الحامل كبير ودة شئ كويس وتم التأكد من قوة التركيب اما الشئ السلبى وتلاحظ بشكل كبير هو حامل تكييف غرفة النوم اللى اتركب فى البلكونة الصغيرة ودة تقريبا خلى البلكونة بلا قيمة لانها هى اصلا صغيرة لما تركب كمان فيها الكمبروسور بتاع التكيف وخصوصا كمان ان الارتفاع مش عالى اوى يعنى الامور مش هتبقى مريحة".


وتقول "جيهان سليمان" من حاجزات المشروع: "انا عمرى ما شفت فى حياتى تركيب حوامل التكييف قبل التشطيب عمله زى اللى ركب نجفة قبل البياض".

ويقول "سامي سعيد" من حاجزي المشروع: "في حالة الرغبة في تقفيل البلكونة بالالوميتال او حتى ستاير، سيؤثر ذلك علي عمل الكمبوريسور لانه محتاج علي الاقل مسافة خالية لاتقل عن 3 متر".

ويقول "عبدالرحمن فتحي" من حاجزي المشروع: "الحامل في البلكونة الكبيرة كمان هيكون مش حلو عشان هيجي سخونة و هوا شغال داخل البلكونة لو يكون تحت الحديد في الوجة السخونية تطلع علي برة".

ويقول "أحمد طلعت" من حاجزي المشروع: "نفسي اشكر الوزارة علي اﻻستجابة لطلبات الناس بتركيب حوامل التكييفات .. لكن تركيبها بالشكل ده داخل البلكونة الملتصقة معناها اننا هانموت داخل غرف النوم والبلكونة مستحيل تتفتح وهتغلق منفذ التهوية الوحيد بتكييف يعمل صوت و مصدر حرارة ..رفقا بينا شوية علشان خاطر ربنا هى مش ناقصة دفنة اكتر ما هى مدفونة".

ويقول "على صبري" من حاجزي المشروع: "مفيش فايده. مش فاهم فين مهندسين المشروع. المقاول شغال لوحده بدون مراقب. ربنا يستر غلطه ومش هتكرر".

وتقول "زينب مقبل" من حاجزات المشروع: "التركيب شغال بالبركة فى المشروع ده لا فى حسيب ولا رقيب مهندسين المشروع واخدين منوم يا رب ارحمنا".

هل تعلم أن: مقالات "القاهرة الجديدة اليوم" يقرأها المسؤولون في وزارة الإسكان في نفس لحظة نشرها، وتعد رسالة مباشرة موجهة للوزارة. 
هل تعلم أن: مقالات "القاهرة الجديدة اليوم" يهتم بمتابعتها يوميا عشرات الألوف من المهتمين بمشروعات وزارة الإسكان المصرية.
إرسل إلينا: رأيك أو اقتراحك أو شكواك المصورة التي تهم أكبر عدد ممكن من الحاجزين بمشروعات وزارة الإسكان لنقوم بنشرها ضمن مقالاتنا.

ويقول "وائل العجمي" من حاجزي المشروع: "بالنسبة للسادة اللي بيقولوا ان الحوامل شوهت منظر العمارة أحب أقولهم اننا طالبنا بكده حتي نحافظ علي الشكل الجمالي حتي يلتزم الكل بنفس المكان و بالنسبة للي بيقول انها ركبت قبل دهان الواجهات فده أفضل طبعا، وبعد إذن حضراتكم خلينا نتكلم بموضوعية شويه فيه حاجات كثير كل الأدمنز بكل الجروبات ضيعوا فيها وقت وبذلوا مجهود خرافي علشان تتحقق و منها حوامل التكييفات اللي كانت مش موجودة اصلا بالمقايسة".

ويقول "إيهاب الجمال" من حاجزي المشروع: "معمول حساب مواسير الصرف للمكيفات بدمياط الجديدة بالاضافة لصرف الامطار من الاسطح والبلكونات لطبيعة الجو الساحلي وتم اخذ موافقة على ذلك".

ويقول "أيمن السيد" من حاجزي المشروع: "آسف ف التشبيه بس فعلا شبه مستشفي طواريء المنصوره، يا ريت منقترحش عليهم بعد كده أي اقتراح لأنه بيتفهم بالعكس. طلبنا هاندريل للكراسي المتحركه عملوه زحاليق علي المدخل. طلبنا حوامل للتكييف عملوه شبه المستشفيات. لنا الله". منشور بـ"القاهرة الجديدة اليوم"
في حين قال المقدم مهندس محمد عمر مشرف الهيئة الهندسية بموقع دار مصر العبور: "إن تركيب حامل تكييف غرفة النوم الرئيسية خارج سور البلكون وأنه يوجد صرف للتكييف"

ويقول "مصطفى السيد" من حاجزي المشروع: "على كده كل مدينة بتفتكس من دماغها!".

ويقول "أحمد نبيل" من حاجزي المشروع: " كله شغال بدماغه في ظل انعدام الرقابة".

ويعود "وليد زكريا" من حاجزي المشروع للقول: "اللى أعرفة انى الشروق والعبور وبدر والعاشر كتيبه واحدة وقيادة واحدة يعنى شغل واحد ولوح واحدة بس اللى فهمته بقى من كده انى ده مشروع عشوائي وكل واحد بيحاول ياخد لنفسه سبق انه هو لى بيعمل الصح بس وملهوش دعوة بالباقى طب بالزمه دة اسمة كلام انتو فاكرينا هبل ولا عبط زى الأبواب اللى فلقت قالك الوزير اللى اختارها بعد كدة اتعدلت وزادت المواصفة 250ج مش بقولكم كله عاوز ياخد لقطة على قفانا كدة الواحد جاب آخرة من المالك والمنفذ لانهم واضح انى كلهم كان تركيزهم على المكسب والربح قبل كل حاجة فنية ولينا ربنا يرحمنا بقى منهم جميعا".

ويقول "مؤمن أحمد" من حاجزي المشروع: "كان فيه اجتماع بسبب كيفية وضع الحوامل ونقلها من على الواجهة وتم التوصل لعدم وضعها علي الواجهة وهذه توزيعات حامل التكييف بعد التعديل":
ويقول  "السيد فرج" من حاجزي المشروع: "هايجى دلوقت المتحدث بتاع الوزارة يقولك الحاجزين مش على قلب رجل واحد ويقومو شايلينهم يا جماعة سيبوهم بقى يركبو فى اى مكان خلونا نخلص وبعدين حكاية الشكل العام والذوق والحاجات دى ما تركبش مع ناس كل همها تطلع بسبوبة من المشروع".

موضوعات ذات صلة:
المتحدث باسم الاسكان في رسالة لحاجزي دار مصر: كنا سنسلمكم كمبوند متكامل ولكنكم لستم على قلب رجل واحد