ابحث في موقعنا

الأحد، 27 مارس 2016

يوميات حاجزو مشروع «دار مصر» للإسكان المتوسط - السبت 2016/3/26


رصد لأبرز ما نشره حاجزو مشروع «دار مصر» للإسكان المتوسط، من آراء ومستجدات عن المشروع، على مواقع التواصل الاجتماعي، السبت 26 مارس 2016.

وتنوه «القاهرة الجديدة اليوم» الصحيفة الأكثر متابعة من حاجزي مشروع دار مصر ومسئولي المشروع؛ أنه يسعدها أن تتلقى الآراء والمستجدات عن المشروع، من الحاجزين بجميع مدن المشروع الإثنى عشر: "القاهرة الجديدة، والشروق، والعبور، وبدر، والعاشر من رمضان، و6 أكتوبر، والسادات، ودمياط الجديدة، والشيخ زايد، و15 مايو، وبرج العرب، والمنيا الجديدة"، وذلك على خاص صفحتها الإخبارية عن المشروع على فيسبوك "ائتلاف سكان مشروع دار مصر للاسكان المتوسط بالقاهرة الجديدة" 30 ألف متابع، وتعد بنشرها على الصحيفة من خلال مقالة "يوميات حاجزي المشروع"، ليشاهدها عشرات الألوف، ويصل أصداؤها خارج الجروبات المغلقة، شرط أن تمثل أهمية لأكبر عدد ممكن من حاجزي المشروع ولا تتضمن إساءة لشخصية أو مؤسسة، علما بأن ما تنشره «القاهرة الجديدة اليوم» منقولا عن حاجزي مشروع دار مصر، يقع على مسئولية السادة المنقول عنهم.

كتب السيد/ أحمد بركات - من حاجزي مشروع دار مصر
مطلوب انشاء مجموعة مدارس دار مصر الرسمية المتميزة للغات تقدم تعليم محترم بمصاريف يقدر عليها حتى الى بيدفع ثمن شقة 600 الف بالتقسيط وهيحرم نفسه واولاده ويعيشهم على الكفاف لحين انتهاء الاقساط لانه في نفس الوقت مش هيقدر يدخل ابنه مدرسة انترناشيونال ب 30 الف ولو عنده 3 اولاد عاوز 100 الف مصاريف مدارس الاخ أبو 600 الف ده شريحة من المجتمع مش اعلاهها ولا أقلها المفروض الدولة توفرله كل الخدمات المناسبة لشريحته

وكتب السيد/ عصام السيد - من حاجزي مشروع دار مصر
خبر أن المقاولون العرب تدخل للمساعدة و لاستكمال مشروع دار مصر.....
كلام عارى من الصحة تماما و تم نفيه خلال اتصال هاتفى تم مع سيادة العميد رامي حيث كان رده ان المقاولين العرب ممكن تدخل اه انما عمارات و مبانى لا .. و لو هتدخل فى اى اعمال مرافق تبقى المعلومة الكاملة عند اجهزة المدن

وكتب أيضا، استمرارا لتعنت الوزارة ضد رغبة الحاجزين فى استلام كمبوند متكامل الخدمات و ليس الاستلام تباعا كما تريد الوزارة فقد تقرر تسليم ما يقرب من ٦٧ عمارة بالقرنفل فى نهاية يونيو القادم و جدير بالذكر ان الزمن المتبقى ثلاثة اشهر منهم شهر رمضان كل عام وحضراتكم بخير 
فهل من المعقول ان يتم الانتهاء من كافة التشطيبات الداخلية و اعمال المرافق و اللاند سكيب فى هذة الفترة القصيرة الا بطريقة عشوائية غير مطابقة لما كنا نحلم به !!!!
و لايسعنى الا ان اقول هذا هو حصادكم من التراخى و السلبية فلو كانت الوزارة وجدت الحاجزين على رأي واحد و يد واحدة على الارض ما كنا وصلنا لتلك المرحلة من تعنت و رفض لجميع المقترحات الفردية التى لم تجد تجمع كبير من الحاجزين لكى يرعاها و يجتهد فى تحقيقها

وكتب السيد/ أحمد الجندي - من حاجزي مشروع دار مصر
يا جماعه مع كامل احترامي اي تجمع سكني دلوقتي بتعمله الدوله دلوقتي فيه مسجد ومستشفي ومول ومدارس وخدمات متكامله ودا بيحصل ف المناطق اللي هيا الاسكان الاجتماعي وحتي الاسكان الزراعي اللي هو المليون فدان اللي بيقولو عليهم 
+ ان الرئيس السيسي ف المؤتمر السكني الاخير موصي اللوا كامل ع الهوا ان يتعمل مسجد في كل تجمع سكني من اللي الجيش بيعمله وكمان فاكر قاله بالنص الاتنين يا كامل وكان يقصد مسجد وكنيسه .. فدا حق يا جماعه مش اننا نتبرع .. ومش معني كلامي ان اللي عايز يتبرع ف حاجه ميتبرعش .. وكمان اخنا دافعين حق الشقق واكتر واي مهندس شغال مع مقاول عارف الكلام دا

وكتب السيد/ جمال اسماعيل - من حاجزي مشروع دار مصر
انا روحت موقع دار مصر اكتوبر لاول مره امس بعد مره فى الاول خالص كانوه لسه بيرفعوه المقاسات المهم
انا بعد رؤيتى للموقع امس انا شايف ان التسليم فى اكتوبر ده من المستحيل تنفيذه للاسف 
الملفت فعلا هو احترام الناس الموجوده بالموقع جميعا هو الشغل شغال على قدم وساق لكن هيهات هيهات فى اللى فاضل انا عماره 127 B هى عند المقاولين 18 B كل عماره ليها مع الشركه المنفذه رقم غير اللى احنا واخدينوه انا شقتى دور اول فوق الارضى لقيت الارضى عباره عن بدروم وانا شقتى يدوب على مستوه الارض قالولى لسه الشارع هياخدوه منه وقالولى احمد ربنا ده فى عماير الدور الرابع مساوى للارض 
انا حمدت واحمد ربنا دائما وابدا على الضراء قبل السراء 
لكن للاسف ولاول مره ااقولها ‫#‏مكانش_ده_حلمى‬

ونشر السيد/ كرم صقر - من حاجزي مشروع دار مصر
الصور المرفقة للطريق بين عماره ٨٩ و ٨٨ بدار مصر اكتوبر وقال:
الرجاء من الحاجزين فى عمارات ٩٠/٩١/٩٢/٧٩/٨٠/٨٨/٨٧ ومنطقة السراديب والمجاورين للتبه الضغط معنا لارسال الايميلات على المهندس وليد عباس وخالد سرور وذلك سرعة ازالة التباب والتبه 
المنظر بجد بشع اوي. وممكن يكون. فرق المناسيب زي ما ضر عماره ٨٩ و٩٠ ممكن يكون له تاثير على الباقى لان الرؤية الحاليه مش واضحه فالرجاء المساعده لارسال الايميلات لسرعة ازالة التباب والتبه بوجه عام 
Waleed_Work_2007@hotmail.com
Khaledsrour63@gmail.com
وكتبت السيدة/ نودي ناصف - من حاجزات مشروع دار مصر
كنت في القرنفل يوم الثلاثاء 22/3 وفيه بعض الاخبار عاوزه اقولهالكم
١- منطقة الخدمات اللي قدام عمارة 273 اصبحت مساحة خضراء ونفس المنطقة في منطقة واحد تحولت لمساحة خضراء ٢ - سيم تركيب بانيو قدم في الغرفة الماستر وليس التحويطة التي سبق ورأيناها في نماذج التشطيبات ودا علي لسان العميد رامي شخصيا ٣ - - منطقة 2 العمل فيها يسير بصورة جيدة جدا وقالوا ان مافيهاش اي مشكلة....٣-بدأ توصيل مواسير الصرف لعمارة في منطقة 3 امام مكتب الهيئة الهندسية..... عموما العمل يسير بصورة مرضية ويتم عمل التشطيبات الداخلية لاكثر م عمارة في منطقة 1..... وقد ابلغتهم اننا لانريد استلام الكمبوند علي مراحل لان الاتربة والضوضاء لايمكن ان يتحملها اي احد استلم شقتة وكان الرد طيب لو استلمتم الكمبوند كامل ومرة واحدة والمنطقة الشمالية المجاورة او اي منطقة مجاورة بدأ فيها الشغل لاي مشروع هاتعملو ايه ساعتها في الاتربة والضوضاء!!!!!! للعلم دا كان رد احد المقاولين!!!!! عموما والله وبكل حيادية الدنيا زي الفل ورغم صغر الرسيبشن خاصة شقة 130 م نموذحA الشقق جميلة والمنطقة رائعة والعميد رامي وكل المهندسين هناك غاية في التعاون ونفسهم يعملولنا كل شيئ وقالوا انهم خاطبوا الهيئة عشان يركبولنا كابينة لحمام الماستر روم ولكن الهيئة رفضت رغم ان جالهم عرض بسعر ٥٠٠ جنيه للكبينة......قلت للعميد رامي ممكن ندفع ٥٠٠ ويتركب الكابينة قال ماينفعش لان احنا ملزمين بما يرد من الوزارة وقال اشتركوا مع بعضكم بعد الاستلام وهتلاقوا الف شركة تركبه رخيص طالما عدد كبير
عموما الحمد لله وربنا يكرم جيرنا اللي عماراتهم لم يتم البدئ فيها في منطقة 1 ويارب يطمن قلبهم ويطمنا عليهم قريبا بإذن الله

وكتب السيد/ محمد المصري - من حاجزي مشروع دار مصر
صعب جدا أن مشروع بالحجم ده يتسلم في 18 شهر خاصة وأن شبكة المرافق العامة غير موجودة اصلا وجاري طرحها الآن الاستعجال في التسليم سيؤدي الي حدوث أخطاء جسيمة في تنفيذ كل بنود الأعمال وهذا ليس في صالح حاجزي المشروع

وكتبت السيدة/ منى عبد العزيز - من حاجزات مشروع دار مصر
المشروع من بدايته يتسم بسوء ادارته والتخطيط الجيد وهو دة الشي اللي اعطي الفرصة للناس تشعر بالتخبط والبلبلة اللي ادي ان احنا مبقناش عارفين حاجة قليل جدا الاشخاص اللي تحس ان كلامه حقيقي ومحدد والتسرع في نشر الاخبار ادي لتضاربها وعدم الثقة يعني الناس مبقتشي فاهمة حاجة من اول بداية المشروع اللي كانت الناس متلغبطة بينه وبين محدودي الدخل علشان كدا اتسحبت كراسات كتير جدا ارجو ان احنا نهدي شوية وننتظر التصريحات الصريحة والواضحة واللي تكون علي لسان وزير الاسكان شخصيا مش حد تاني مع احترامي لكل التصريحات علي لسان اشخاص اخرين ويا خبر بفلوس بكرة يبقي ببلاش الامور مش هاتوضح الا مع استلام اول مرحلة

وكتب السيد/ أسامة سيد - من حاجزي مشروع دار مصر
خبر أن "وكيل اول الوزارة المهندس محمد هشام درويش، أكد إن وزارة الإسكان إنتهت من مرحلتين بمشروع دار مصر، والمرحلة الثالثة سوف تكون بنهاية هذا العام، مشيرا إلى أنه سوف يتم توفير وحدات للمتقدمين في المرحلتين السابقتين ولم يحصلوا على وحدات قبل بدء المرحلة الثالثة"..............ايه الكلام العجيب دة الراجل عايش معانا ولا نازل من الفضاء انت لم تنتهى من المرحلة الأولى والثانية انتا أجريت القرعة بس وحصلت الفلوس وهتتاخر فى التسليم وتشطيب تعبان جدا ....وبعدين اية حكاية خاسري المرحلة الأولى إلى هيخدو فى المرحلة الثالثة ولا قصدك المتبقين من قرعة 140 ب متكرر تم إجراء تغير رغبتهم فى المرحلة الثانية...اقعد مع حد مقدم فى المشروع يابشمهندس وهوا يفهمك المشروع وصل لفين. .. اسف للأسلوب بس زهقت بجد

وكتب السيد/ محمد سامي - من حاجزي مشروع دار مصر
منطقة 2 و 3
استمرارا للتجاهل لمتضرري المنطقة ديه ومشاكلها من باقي الحاجزين و الادمنز الا القليل منهم ، زيادة القسط 7 سنين مش هيرفع الضرر من علينا ، المنطقة ديه ممكن تسلم سنة متأخر عن باقي الشمروع كله
يعني لو القسط بقي 7 سنين يعني هدفع حوالي 6500 في الشهر بدل من 8500 في الشهر و هكون مستلمتش الشقة وغيري ساكن وانا هدفع ثمن ايجار شقة سنة لحين الاستلام ، طيب وده يرضي مين بقي
كالعادة احنا منسيين ومصلحتنا محدش بينظرلها فبعد اذنكم يا نشوف حلول ترفع الضرر عن الجميع يا نعلنها ان كل واحد هيشوف مصلحته ونتعامل علي الاسس ده
واقتراحي لحل لمشكلة بسيط المطالبة تكون 7 سنين أو 6 سنين من تاريخ الاستلام

وكتبت السيدة/ حياة الشيمي - من حاجزات مشروع دار مصر
عايزة اقولكم انا حاجزة فى العاشر من رمضان ورحت الموقع لقيت العمارة مفهاش قالب طوب مبنى لما سالت المنهدس عن كلام الوزير والتسليم فى شهر 6 ضحك وقالى يمكن وقلته احتمال شهر 9 برضه ضحك وعرفت ان الاستشارى اللى ماسك المكان كسلان يعنى بالشكل ده ولا السنه الجايه ودا مش اول واحد يقول الكلام ده العمال قاعدين والشغل بطئ انما فى الموقع شرق ده الشغل فيه ماشى بسرعة علشان الاستشارى هناك نشيط وشغال ليل ونهار

وكتبت السيدة/ نهى خالد - من حاجزات مشروع دار مصر
هو الشغل ماشي ببطئ ليه كده في القرنفل . مش شغالين ليه في المرافق و التشطيبات و منطقة 2 و 3 . هي الوزارة ناوية على أيه . عايزين ندفع 25000 جنيه كل ثلاثة شهور و مفيش أخبار على عقود و ﻻ شغل واضح في المواقع و بنشكر في مواعيد الجيش و اشرافهم . و ﻻ اشراف عدل و ﻻ مواعيد عدلة . و عمالين يطرحوا في اراضي ملهاش مرافق و مراحل جديدة . ربنا يستر
هو هيسلم الشقق اللي في العمارة اللي فيها النماذج و طبقا مرافقهم سهلة على الشارع الرئيسي و يقول كده أحنا وعدنا و أنجزنا . كل المسئولين في مصر شكل واحد يفرح
وكتب السيد/ الرواد مودرن سكول - من حاجزي مشروع دار مصر
وزير الاسكان الدكتور مصطفى مدبولى من انشط الوزراء فى مصر ... والعهد الذهبى للاسكان فى مصر هو عهد الدكتور مصطفى مدبولى ..... ويشبه عهد عثمان والكفراوى .... كمية العمران شقق واراضى التى نفذت فى عهده غير مسبوقة فى تاريخ مصر وغير مسبوقة فى تاريخ دول كثيرة .... لاول مرة تكون الدولة المنافس الحقيقي فى كل انواع الاسكان والعقارات لضبط ايقاع السوق لمصلحة المشترى ... نتمنى ان يستمر حماس الوزير وفريقه .... وتعاون الوزارة مع الهيئة الهندسية ... لاول مرة فى تاريخ مصر تقتحم الدولة مجالات كل انواع الاسكان ... ولاول مرة فى تاريخ مصر ينص دستورها على ان السكن الصحى والمريح والمناسب حق للمواطن ... حجم الاستثمارات فى مشروعات الاسكان للمليون شقة محدودى الدخل يصل الى ٢٠٠ مليار جنية ... ولاول مرة يكون هناك سكن لمنخفضى الدخل وسكان العشوائيات وذوى الاعاقة .... وحجم الاعمال فى الاسكان المتوسط لاكثر من ١٢٠ مليار جنية ..... بخلاف الاستثمار فى المرافق والاراضى ... شكرا مصر الحديثة فى عهد السيسى ..... وشكرا لوزارة الاسكان فى عهد مصطفى مدبولى .... لا تهضموا الناس حقها ... اتركوهم يعملون فى صمت لانهم وطنيون لا يبحثون عن شهرة ولكنهم امنوا بمصر الحديثة .... مشروع ابنى بيتك من مشروعات مبارك ومحمود سليمان وهدفه افقار الشعب واذلاله .... ويعانى منه الشباب حتى الان وليس على مصطفى مدبولى ووزارته اى مسئولية ... اذا كان هناك من مساءلة ومسئولية يجب ان توجه لمبارك وحكومة عاطف عبيد ومحمود سليمان وزير الاسكان فى عهد مبارك .... الذى حول الوزارة الى تكية للاقارب والمحاسيب وخرابة للمواطنين الشرفاء ... تحية الى مصطفى مدبولى وفريق عمله .... وتحية للهيئة الهندسية للقوات المسلحة وتحية لشركات المقاولات والعاملين الشرفاء

وكتب أيضا، بلاش ترديد وترويج الشائعات الهدامة التى يروج لها السماسرة والجماعات الارهابية ... مشروعات الاسكان الحالية تدار بحرفية وجدية ونجاح غير مسبوق لمشروعات بهذا الحجم من قبل وزارة الاسكان والهيئة الهندسية

وكتب السيد/ طارق حشيش - من حاجزي مشروع دار مصر
لكى تعرفوا مشاكل الاسكان أدعوكم لزيارة المحكمة الإدارية العليا لكى تروا كمية القضايا المرفوعة على وزارة الإسكان وهيئة المجتمعات العمرانية الجديدة لمخالفتها الشروط والقوانين ومقابر القاهرة الجديدة خير دليل على الفساد

وكتب السيد/ أحمد المغربي - من حاجزي مشروع دار مصر
الحكومة بتبيع اراضى فى كل مكان وتبيع شقق سكنية فى كل المحافظات هل تلك الاراضى والشقق سوف تؤثر سلبيا على سوق العقارات فى ظل سحب مد خرات المصريين مما يؤدى على ضعف فى السيولة اكثر فاكثر وينعكس ذالك على اسعار العقارات عموما بالانخفاض ويسبب الازمة كبيرة ممكن الاسعار تنزل للنصف والله اعلم من يتفق مع وجهة نظرى واو يختلف معى عليه بالتعليق

وكتب السيد/ طارق الشاذلي - من حاجزي مشروع دار مصر
مطلوب موقف جماعي للتمسك بحقوقنا لكل المراحل لأن المرحلة الأولي انتهي القسط الصغير والمفروض يدفع القسط الكبير الشهر القادم فيجب التوقف عن سداد القسط الكبير لكل المراحل حتي الإستلام طبقا للعقد أو يتم دفع ذات القسط الصغير كل ثلاثة أشهر حتي الإستلام ثم يقسم الباقي علي أربعة سنوات قسط ربع سنوي وهذا هو العدل

وكتب السيد/ طارق منصور - من حاجزي مشروع دار مصر
جيرانى اﻻعزاء ﻻبد من وجود نظامين في غاية اﻻهميه للحفاظ على هذا المشروع ان يستمر كما نحلم به وهما (نظام امنى محكم ، شركة صيانة وتجميل محترمه ) حتى ﻻيتحول المشروع الى اسكان عشوائى نتيجة ﻻنحدار مستوى الصيانه فى الﻻند اسكيب وحتى ﻻيكون الكمبوند مأوى للصوص والخارجين عن القانون .وبهذين النظامين يكون مشروع دار مصر بحق مشروع حضارى قد حقق الغرض من انشائه .

وكتبت السيدة/ صافي علاء - من حاجزات مشروع دار مصر
ال شايف انه وقع في الفخ يهرب منه وال شايف ان ده قرف ينظف نفسه ويروح حته نظيفه. انزلوا وشوفوا العروض ال بتظهر علي النت ًوانت بتصفح الفيس. انت عارف يعني ايه يوصل مرافق ويعمل محطات مياه وصرف في كل هذه المدن وكل هذه الكيلوا مترات
علي فكره لي اكثر من صديقه كان طالع ليهم ارض في التجمع الخامس كمان ايام الرخص باعوا كل حاجه ومش قدرين غير الإجراءات وتؤجر مولد كهرباء من العرب ومياه وغرمات كل يوم. النتيجه ال طلعوا بيها ان شراء العبد ولا تربيته وبيندموا اشد الندم انهم كانوا اشتروا شقق وخلاص. بس الانسان مش بيحس وهو بعيد غير لما يكون جوا الموضوع يصرخ. ربنا يجملها بالستر ويتم علي خير. اما أسعار الحديد والاسمنت حدث ولا حرج يعني احنا محظوظين افرحوا واستبشروا

وقام السيد/ عاطف الجبالي من حاجزي مشروع دار مصر، بتصوير فيديو لزيارته الميدانية لمشروع دار مصر الأندلس المرحلة الأولى بالقاهرة الجديدة:

متابعة لأعمال المحارة والكهرباء بوحدات مشروع دار مصر بالأندلس بالقاهرة الجديدة 

زيارة ميدانية لمنطقة الـ29 عمارة - مشروع دار مصر الأندلس المرحلة الأولى بالقاهرة الجديدة 

زيارة ميدانية لمنطقة الـ70 عمارة - مشروع دار مصر الأندلس المرحلة الأولى بالقاهرة الجديدة

موضوعات ذات صلة: